ᐱᒻᒪᕆᐅᕗᖅ ᖃᐅᔨᒪᔭᐅᒋᐊᖃᓪᓚᕆᑦᑐᓂᑦ ᖃᐅᔨᒪᓗᑎᑦ ᐳᕙᓪᓗᓇᕐᒧᓕᖓᔪᓂᑦ ᐃᓱᒪᓂᕐᓗᒍᑎᐅᓲᓂᑦ ᐋᓐᓂᐊᒥᒃ ᐃᓱᒪᓂᕐᓗᒍᑎᐅᓂᐊᖕᖏᒪᑦ ᐋᓐᓂᐊᒃ ᑲᑉᐱᐊᒋᔭᐅᒍᓐᓀᓗᓂᓗ.
ᐳᕙᓪᓗᓇᖅ ᐁᑦᑐᑎᐅᓱᖑᖕᖏᓚᖅ ᐊᑦᑐᐃᓂᑐᐃᓐᓇᑎᒍᑦ.
ᓭᒧᕐᓃᑦ, ᐅᕐᕕᐅᔭᓂᑦ ᑲᐳᕐᖃᐅᑎᓂᑦ ᐊᑐᖃᑎᒌᓐᓂᓄᑦ, ᐃᕿᑦᓯᓂᒃᑯᑦ, ᐊᑦᑐᐃᓂᒃᑯᑦ, ᑯᓂᓐᓂᑯᑦ, ᐃᒥᕈᑎᒧᑦ ᐃᒥᖃᑎᒌᓐᓂᑎᒍᑦ ᓱᓇᑐᐃᓐᓇᑎᒍᓗᓐᓃᑦ ᐃᕐᐸᑎᑦᓯᓂᐊᖕᖏᓚᖅ ᐋᓐᓂᐊᒥᒃ. ᐳᕙᓪᓗᓇᖅ ᐃᕐᐸᓲᖑᕗᖅ ᐊᓂᕐᑎᕆᔭᑎᒍᑦ, ᐃᓄᒃ ᐁᑦᑐᑐᑎᐅᒍᓐᓇᑐᒥᒃ ᐳᕙᓪᓗᑐᖅ ᖁᐃᕐᑐᐸᑦ ᑕᒋᐅᑉᐸᓗᓐᓃᑦ. ᐃᕐᐸᕈᓐᓇᒥᔪᖅ ᐃᔪᕐᓂᑐᐃᓐᓇᑎᒍᑦ, ᙯᒐᓕᕐᓂᑯᑦ, ᐅᖄᓂᒃᑯᑦ, ᐃᖕᖏᓂᒃᑯᑦ ᐊᓂᕐᑎᕆᓂᑎᒍᓗᓐᓃᑦ. ᑭᓯᐊᓂ, ᐃᓄᒃ ᐊᒥᓱᓂᒃ ᑫᕙᓪᓚᒍᓯᕐᓂᑦ (ᐃᑲᐅᕐᓂᓂᑦ) ᑕᒃᑲᓂᑦᓭᓇ ᐃᓂᒥᒍᓂ ᐊᓂᕐᑎᕆᔭᖓ ᐊᓂᐊᑦᓯᖏᑦᑐᒥᖃᑎᖃᕐᓗᓂ ᐃᓄᒻᒥᒃ ᐁᑦᑐᑐᑎᐅᒍᓐᓇᑐᒥᒃ ᐳᕙᓪᓗᑐᒥᒃ ᐳᕙᓪᓗᓕᑐᐃᓐᓇᕆᐊᖃᕋᔭᕐᖁᖅ. ᒥᑭᔪᐊᐲᑦ ᖃᓂᕐᒥ ᐱᔪᑦ ᐳᕙᓪᓗᓇᕐᒥᒃ ᐃᕐᐸᑎᑦᓯᒍᓐᓇᖁᑦ ᖃᓂᑕᖏᓐᓄᑦ ᐃᓅᑉ ᐁᑦᑐᑐᐃᒍᓐᓇᑑᑉ.
ᐳᕙᓪᓗᓇᖅ ᐋᓐᓂᐊᓯᐅᕐᑕᐅᒍᓐᓇᖁᖅ ᓄᓇᕕᒻᒥ.
ᐃᓄᐃᑦ ᐁᑦᑐᑑᑎᐅᒍᓐᓇᑐᒥᒃ ᐳᕙᓪᓗᑐᑦ ᐱᓪᓗᑯᒋᐊᓕᑎᒍᑦ ᑲᒪᒋᔭᐅᒋᐊᓖᑦ ᐊᐅᓪᓚᑎᑕᐅᑐᐃᓐᓇᕆᐊᖃᕐᖁᑦ ᒪᓐᑐᕆᐊᓪᒧᑦ, ᑭᓯᐊᓂ ᑌᒣᑦᑐᖃᓪᓗᐊᖏᑦᑐᖅ. ᐊᒥᓲᓂᕐᓴᑎᒍᑦ ᐋᓐᓂᐊᕕᒻᒥᒋᐊᖃᕐᖁᑦ ᐃᓅᓕᑦᓯᕕᒃ ᐋᓐᓂᐊᕕᖓᓂ ᐳᕕᕐᓂᑐᒥ ᐅᕝᕙᓗᓐᓃᑦ ᑐᓚᑦᑕᕕᒃ ᐋᓐᓂᐊᕕᖓᓂ ᑰᑦᔪᐊᒥ, ᐃᓄᑑᒃᑯᕕᒻᒦᓗᑎᓗ ᒪᕐᕉᒐᓚᓐᓂᒃ ᐱᓇᓱᐊᕈᓰᓐᓂᒃ. ᐋᓐᓂᐊᓂᕐᓴᐅᐸᑦ, ᐊᑯᓂᕐᓂᓴᒥᒃ ᐁᑦᑐᑑᑎᖃᕈᓐᓇᕈᓂ ᐊᑯᓂᕐᓂᓴᒥᒃ ᐋᓐᓂᐊᕕᒻᒥᒋᐊᖃᕋᔭᕐᑐᖅ. ᐳᕙᓪᓗᑐᒃ ᐁᑦᑐᑐᑎᖃᕐᖃᔦᕈᓂ, ᐋᓐᓂᐊᕕᒻᒥ ᐊᓂᒍᓐᓇᑐᖅ. ᑭᓯᐊᓂ, ᐋᓐᓂᐊᓯᐅᑎᒥᓂᒃ ᐄᕐᖃᓯᐊᕆᐊᓕᒃ ᐊᒥᓱᒐᓚᓐᓂᑦ ᑕᕐᕿᓂᑦ ᓄᖒᑦᓯᓯᐊᕐᓗᓂ ᐋᓐᓂᐊᓯᐅᕐᑕᐅᒍᑎᒥᓂᒃ.
ᑭᓇᑐᐃᓐᓇᖅ ᐳᕙᓪᓗᓕᕈᓐᓇᖁᖅ.
ᐃᓄᐃᑦ ᐋᓐᓂᐊᔪᑦ ᐁᑦᑐᑐᑎᐅᒍᓐᓇᑐᒥᒃ ᐳᕙᓪᓗᑐᑦ ᓴᐳᑦᔭᐅᓯᐊᕆᐊᖃᕐᖁᑦ ᐃᓚᒥᓄᑦ, ᐃᓚᓐᓈᒥᓄᑦ ᓄᓇᓕᒻᒥᐅᓕᒫᓄᓗ. ᖃᐅᔨᒪᔭᐅᑦᓯᐊᕆᐊᓕᒃ ᐃᓄᒃ ᐳᕙᓪᓗᓕᕐᓯᒪᔪᖅ ᐋᓐᓂᐊᕕᒻᒥᒋᐊᑐᒍᓐᓀᑐᖅ ᐄᕐᖃᒐᕐᑐᒪᑦᓯᐊᖏᓐᓇᑐᕐᓗ ᐁᑦᑐᑐᐃᒍᓐᓇᕈᓐᓀᓂᖓᓂᒃ ᐊᑦᑕᓇᕐᑐᒍᓐᓀᓱᓂᓗ ᐊᓯᒥᓄᑦ. ᑫᓪᓗᑐᕐᑕᐅᓯᐊᒋᐊᖃᕐᖁᑦ ᐄᕐᖃᓯᐊᖁᔭᐅᓗᓂ ᑕᕐᕿᓂᑦ ᐱᖓᓲᔪᕐᑐᓂᑦ ᖁᓕᐅᖕᖏᒐᕐᑐᓄᑦ (ᑕᓪᓕᒪᐅᔪᕐᑐᓄᑦ) ᐋᓐᓂᐊᓯᐅᕐᑕᐅᓗᓂ. ᓇᕐᕈᓃᑦ ᐃᓄᓐᓂᑦ ᐳᕙᓪᓗᑐᓂᑦ ᓱᒃᑯᐃᓱᖑᕗᑦ ᐃᓄᓐᓂᑦ ᓄᓇᓕᓕᒫᒥᓗ. ᐃᓄᓐᓂᑦ ᐳᕙᓪᓗᑐᓂᑦ ᐱᐅᖕᖏᓴᕆᐊᖃᖕᖏᑐᑦ; ᑭᓯᐊᓂᓕ, ᑫᓪᓗᑐᖔᕐᓗᒋᑦ ᓄᖒᑦᓯᓯᐊᖁᓗᒋᑦ ᐋᓐᓂᐊᓯᐅᕐᑕᐅᒍᑎᒥᓂᒃ ᒪᓕᑦᓯᐊᓗᓂᓗ ᐋᓐᓂᐊᓯᐅᕐᑎᐅᑉ ᒪᓕᑦᑕᐅᖁᔭᖏᓐᓂᑦ.
ᐊᔪᐃᓐᓇᕈᑎᐅᕗᖅ ᓄᖑᑎᕆᒐᓱᓐᓂᖅ ᐳᕙᓪᓗᓇᕐᒥᒃ ᓄᓇᕕᒻᒥ.
ᐱᒋᐊᕐᑎᓯᓯᕗᒍᑦ ᓄᑖᒥᒃ ᖃᓄᐃᓗᕆᐊᒍᑎᑦᓴᒥᒃ ᓄᖑᑎᕆᒐᓱᓐᓂᒧᑦ ᐳᕙᓪᓗᓇᕐᒥᒃ. ᓄᓇᕕᒻᒥ ᐊᑐᖃᑎᐅᓱᖕᖑᕗᑦ ᐅᖃᕐᑕᐅᖃᒻᒥᒥᒃ ᑮᓇᐅᔭᖃᕐᑎᓯᒍᑎᑦᓴᓕᐊᕕᓂᕐᓂᑦ $27.5 ᒥᓕᐊᓐᓂᑦ ᑲᕙᒪᑐᖃᒃᑯᓄᑦ ᑐᕌᒐᖃᕐᓱᑎᑦ ᓄᖑᑎᕆᒐᓱᓐᓂᒧᑦ ᐳᕙᓪᓗᓇᕐᒥᒃ ᓄᓇᖁᑎᖓᓂ. ᓴᐳᑦᔨᑎᓪᓗᒋᑦ ᑲᕙᒪᖓ ᑯᐯᒃ, ᓄᓇᕕᒃ ᐱᒋᐊᕐᓯᒪᓕᕐᖁᑦ ᐃᓘᓐᓈᒍᕐᑐᓂᑦ ᐸᕐᓀᕈᑎᒥᒃ ᖃᓄᐃᓗᕈᑎᑦᓴᓂᑦ ᑐᕌᒐᖃᕐᓱᓂ ᐃᕐᐸᕙᓪᓕᐊᒋᒃᑯᑎᑦᓴᖓᓂᒃ ᐳᕙᓪᓗᓇᐅᑉ ᓄᖑᑎᓪᓚᕆᓪᓗᒍᓗ ᐅᑎᓂᐊᕈᓐᓀᓗᓂ. ᑮᓇᐅᔭᖃᕐᑎᓯᒋᐊᓪᓚᒍᑏᑦ ᐃᑲᔪᕐᓯᓂᐊᕐᖁᑦ ᐱᒋᐊᕐᑎᓯᒍᑎᐅᓗᑎᑦ ᓄᓇᓖᑦ ᐱᐅᒡᒍᑎᖃᕐᓗᑎᓗ ᐋᓐᓂᐊᓯᐅᕆᓂᕐᑎᒍᑦ ᖃᐅᔨᒪᔨᖃᕐᓂᑎᒍᓗ ᑲᔪᓯᒍᓐᓇᓂᐊᕐᒪᑕ ᐊᑌᓐᓇᑐᓗᑎᓗ ᐊᔪᐃᓐᓇᕈᑎᐅᔪᑦ ᓄᖑᑎᕆᒐᓱᓐᓂᒥ ᓄᑖᓂᑦ ᐳᕙᓪᓗᓕᕐᑐᓂᑦ ᐁᑦᑐᑐᑎᐅᒍᓐᓇᑐᓂᑦ, ᑕᒪᓐᓇᓗ ᐊᕐᕌᒍᒋᓂᐊᕐᑕᑎᓐᓂ ᖁᓕᓂᑦ. ᒫᓐᓇᐅᑎᓪᓗᒍ, ᐊᔪᐃᓐᓇᕈᑎᐅᓂᕐᓴᐅᒋᐊᓪᓚᓂᐊᕐᖁᑦ ᐃᓅᖃᑎᒌᑎᒍᑦ ᐱᑦᔪᑎᐅᔪᓂᑦ ᐱᒋᐊᕐᕕᐅᔪᑦ ᐳᕙᓪᓗᓕᕐᑐᓂᑦ ᐅᓄᕐᑐᒪᕆᐅᑦᓱᑎᑦ ᓄᓇᕕᒻᒥ, ᐅᑦᑑᑎᒋᓗᒍ ᐊᒥᓱᓗᐊᕐᑐᑦ ᐃᓪᓗᒥᐅᖃᑎᒌᑦ, ᓂᕿᖃᖕᖏᓃᑦ ᓱᐴᕈᓯᔭᕐᓂᓗ.